Dewch o hyd i’ch dillad parti gorau! Mae’r cefndryd Lowri Elen Jones, 19 oed o Beniel yn Sir Gaerfyrddin, a Lisa Ann Evans, 21 oed o Langybi yng Ngheredigion, yn trefnu dawns elusennol, raffl ac ocsiwn er budd Apêl Gerddi Ysbyty Tywysog Philip.
Cynhelir y digwyddiad yn Neuadd Bronwydd, Caerfyrddin am 7:00pm ddydd Sadwrn 15 Mehefin 2024.
Nod Apêl Gerddi Ysbyty Tywysog Philip yw ariannu gerddi therapiwtig newydd i gleifion yn Ward Mynydd Mawr, uned adsefydlu gofal henoed 15 gwely, a Ward Bryngolau, uned iechyd meddwl oedolion hŷn 15 gwely. Mae’r wardiau wedi’u lleoli drws nesaf i’w gilydd ar lawr gwaelod yr ysbyty ac mae ganddynt fynediad i le awyr agored caeedig. Fodd bynnag, nid yw’r gofod hwn yn cael ei ddefnyddio ar hyn o bryd ac nid yw’n addas ar gyfer cleifion.
Penderfynodd Lowri a Lisa drefnu’r digwyddiad er budd yr Apêl gan fod eu tad-cu, Hywel Griffiths, yn glaf ar Ward Bryngolau.
Dywedodd Lowri: “Mae’r achos teilwng hwn yn agos iawn at ein calonnau fel teulu. Rydym wedi penderfynu cynnal dawns i godi arian at yr Apêl i ddangos ein gwerthfawrogiad a’n diolchgarwch i’r ward.
“Mae fy Nhad-cu yn gyn-ffermwr, felly mae wedi arfer ag awyr iach a bod allan ym mhob tywydd.
“Yn ôl ym mis Awst 2023, cafodd ei symud i Ward Bryngolau. Siomedig oedd gwybod nad oedd y man awyr agored yn addas ar gyfer y cleifion, o gofio pa mor bwysig yw fitamin D i’n hiechyd meddwl, heb sôn am glaf sydd mewn gofal i wella eu hiechyd meddwl. Bydd y gerddi hyn o fudd i bob claf ar y ward beth bynnag fo’u cefndir.
“Gwerthodd y tocynnau’r ddawns allan mewn llai nag wythnos ar ôl i ni eu rhyddhau. Roeddwn i a Lisa wedi fy syfrdanu gan faint o ddiddordeb a chefnogaeth a gawsom gan ffrindiau. Ein nod yw codi cymaint o arian â phosibl er mwyn gallu helpu’r holl gleifion, staff ac ymwelwyr ar y ward.”
Dywedodd Nicola Llewelyn, Pennaeth Elusennau Iechyd Hywel Dda, elusen swyddogol Bwrdd Iechyd Prifysgol Hywel Dda: “Hoffem ddiolch yn fawr iawn i Lowri a Lisa am drefnu digwyddiad mor wych er budd yr Apêl.
“Mae cefnogaeth ein cymunedau lleol yn ein galluogi i ddarparu gwasanaethau y tu hwnt i’r hyn y gall y GIG ei ddarparu yn nhair sir Hywel Dda ac rydym yn hynod ddiolchgar am bob rhodd a dderbyniwn.”
Os hoffai unrhyw un brynu tocyn raffl neu roi cyfraniad tuag at y digwyddiad, cysylltwch â Lowri ar 07903 128183.
I gael rhagor o wybodaeth am Apêl Gerddi Tywysog Philip, ewch i:
I gael rhagor o fanylion am yr elusen a sut y gallwch chi helpu i gefnogi cleifion a staff lleol y GIG, ewch i www.hywelddahealthcharities.org.uk
| [donate]
| Help keep news FREE for our readersSupporting your local community newspaper/online news outlet is crucial now more than ever. If you believe in independent journalism,then consider making a valuable contribution by making a one-time or monthly donation. We operate in rural areas where providing unbiased news can be challenging. |