Mae cwmni, gyda chanolfan yng Nghymru, sy’n arbenigo mewn darparu gwasanaeth band eang cyflym i ardaloedd gwledig yn cynyddu ei dîm o staff er mwyn ehangu ei wasanaeth i ardaloedd anodd eu cyrraedd.
Mae Voneus, sydd wedi symud i eiddo mwy yng Nghaerfyrddin, eisoes wedi sefydlu tîm cyswllt â’r gymuned ac yn chwilio am staff i lenwi swyddi eraill, yn cynnwys staff gwerthu a pheirianwyr.
Mae Voneus yn gwmni a gymeradwywyd gan y llywodraeth ar gyfer darparu band eang cyflym iawn (superfast) a band eang gwibgyswllt (ultrafast) i ardaloedd anodd eu cyrraedd. Gwnânt hynny mewn 22 o siroedd yn y Deyrnas Unedig. Yn gynharach eleni, fe wnaethant brynu cwmni Dyfed IT oedd yn gweithredu o Geredigion, gan barhau i gyflogi pob un o’u staff.
Hyd yma, penodwyd tri aelod o staff i ffurfio tîm cyswllt â’r gymuned. Yr arweinydd yw Naomi Marshall, sy’n siarad Cymraeg yn rhugl. Bu hi’n gweithio yn y diwydiant am 15 mlynedd. Mae dau gynorthwyydd, Susan Pitcher ac Adam Stockwell, hefyd yn aelodau o’r tîm.
Gweithiodd y tri ohonynt yn yr ardal am o leiaf 20 mlynedd, fel bod ganddynt wybodaeth a dealltwriaeth fanwl o anghenion band eang siroedd canolbarth a gorllewin Cymru.
Mae Voneus yn gosod rhwydweithiau sy’n galluogi cyflymder o 100Mbps i 1Gbps ym mhob rhan o Sir Benfro, Sir Gâr, Ceredigion a Phowys.
Meddai Zoe Day, pennaeth cyswllt â’r gymuned Voneus: “Mae gwaith y tîm cyswllt â’r gymuned yn allweddol inni.
“Gwyddom mor bwysig yw bod yn rhan o’r cymunedau a wasanaethwn. Nid ydym eisiau bod yn fusnes pell i ffwrdd ac anodd ein cyrraedd sy’n gosod systemau ac yna’n anghofio am y bobl sy’n eu defnyddio.
“Bydd ein tîm cyswllt â’r gymuned yn gweithio’n agos gyda thrigolion a busnesau lleol i ddeall eu anghenion a’u dymuniadau yn ogystal ag adeiladu perthynas dda â chyrff allweddol fel cynghorau bro a thref, capeli ac eglwysi.”
Mae swyddfeydd newydd Voneus yn Swît Swyddfeydd MacGregor ar Lôn Jolly Tar yng nghanol Caerfyrddin – lle sy’n ddigon mawr i ganiatáu i Voneus dyfu ac ehangu ymhellach.
Meddai Naomi Marshall, a fu gynt yn gweithio i BT ac EE: “Yn Voneus, rydym yn awyddus iawn i gael gwared â chyflymder band eang gwael mewn ardaloedd gwledig a gweithredu er lles ehangach y gymuned gyfan.
Ychwanegodd: “Mae’n wych cael y cyfle i wneud hynny yn yr ardal lle dwi’n byw a gweithio.”
Mae Voneus yn frwd o blaid cysylltu cymunedau anodd eu cyrraedd, sy’n aml yn teimlo iddynt gael eu gadael ar ôl, fel eu bod yn gallu mwynhau’r un cyflymder band eang â thrigolion canol y dinasoedd mawr.
Ychwanegodd Naomi : “Mewn ardaloedd anghysbell yn aml iawn mae pobl yn methu gwneud tasgau syml ar lein fel uwchlwytho ffeiliau wrth weithio o gartref, neu wylio’r sioe ddiweddaraf trwy wasanaeth ffrydio am fod y cyflymder yn rhy araf.
“Byddwn yn trawsnewid hynny, a dymunwn gyflogi rhagor o swyddogion cyswllt â’r gymuned, aelodau ychwanegol o’r tîm gwerthu, nifer dda o beirianwyr a staff gweinyddol i’n helpu i gyrraedd ein nod uchelgeisiol.
“Dylai unrhyw un sydd â diddordeb yn un o’r swyddi hyn gyflwyno cais ar unwaith!”
I wybod rhagor, cysylltwch â Voneus drwy ffonio 0800 007 3377 neu e-bostio broadband@voneus.com.
Gallwch hefyd ymweld â’r wefan www.voneus.com
| [donate]
| Help keep news FREE for our readersSupporting your local community newspaper/online news outlet is crucial now more than ever. If you believe in independent journalism,then consider making a valuable contribution by making a one-time or monthly donation. We operate in rural areas where providing unbiased news can be challenging. |
