Mae ITV Cymru Wales a Mencap Cymru yn falch o fod wedi lansio partneriaeth newydd sbon gyda’r nod o helpu i gael gwared ar rwystrau i bobl anabl sy’n ceisio gweithio yn y diwydiant Teledu a Darlledu.
Drwy gydweithio, mae’r ddau sefydliad yn gobeithio codi gwell ymwybyddiaeth ymhlith cyflogwyr i sicrhau bod pobl ag anableddau dysgu yn cael mwy o fynediad at gyfleoedd cyflogaeth.
Fel rhan o Wythnos Anabledd Dysgu 2022, cynhaliwyd digwyddiad lansio arbennig yn y Senedd ddydd Mawrth 21 Mehefin lle daeth staff Mencap Cymru, aelodau a phobl y maent yn eu cefnogi ledled Cymru ynghyd â gweithwyr ITV Cymru Wales i ddathlu’r bartneriaeth newydd.
Fel rhan o’r bartneriaeth newydd, cynhaliodd ITV Cymru Wales Ddyddiau Hyfforddiant Cyfryngau yn ddiweddar i bobl a gefnogir gan Mencap Cymru a’u grwpiau lleol. Rhoddodd y dyddiau Hyfforddiant Cyfryngau brofiad tu ôl i’r llenni o’r hyn sy’n digwydd yn ystafell newyddion ITV Cymru Wales, a chynnig profiad ymarferol o gyflwyno bwletinau tywydd a newyddion i gamera.
Dywedodd Phil Henfrey, Pennaeth Newyddion a Rhaglenni ITV Cymru Wales:
“Rydym yn falch iawn o gael lansio’r bartneriaeth newydd hon gyda Mencap Cymru, a thrwy gydweithio rydym eisiau sicrhau bod pobl ag anabledd dysgu yn cael cyfle cyfartal i lwyddo mewn gyrfa yn y diwydiant creadigol.
“Mae Darlledwyr Gwasanaeth Cyhoeddus gan gynnwys ITV yn parhau i ddod â buddion sylweddol i gymdeithas mewn nifer o ffyrdd, a gobeithiwn y bydd ein partneriaeth newydd yn cadarnhau ymrwymiad ITV i greu cyfleoedd, gwella amrywiaeth yn y byd Teledu a Darlledu.”
Dywedodd Wayne Crocker, Cyfarwyddwr Mencap Cymru:
“Mae hwn yn gyfle cyffrous iawn i bobl ag anabledd dysgu ddatblygu hyder o flaen a thu ôl i’r camera. Mae brwdfrydedd ac ymrwymiad ITV Cymru Wales i wneud y bartneriaeth hon yn llwyddiant wedi gwneud argraff fawr arnom.”
Dywedodd Steffan Hopping, a gymerodd ran yn yr hyfforddiant:
“Fe wnes i wir fwynhau cymryd rhan yn yr hyfforddiant cyfryngau a dysgu cymaint mwy amdanaf fy hun a gweithio yn y cyfryngau. Rwy’n edrych ymlaen at ddatblygu fy sgiliau a threulio mwy o amser gydag ITV Cymru Wales”.
| [donate]
| Help keep news FREE for our readersSupporting your local community newspaper/online news outlet is crucial now more than ever. If you believe in independent journalism,then consider making a valuable contribution by making a one-time or monthly donation. We operate in rural areas where providing unbiased news can be challenging. |
