Gallai miloedd o bobl yng Ngheredigion a Sir Gaerfyrddin fod yn gymwys am gyrsiau am ddim i’w helpu i ailhyfforddi

Mae miloedd o bobl yng Ngheredigion a Sir Gaerfyrddin nawr yn gymwys am hyfforddiant am ddim i newid eu gyrfa drwy sefydlu Cyfrif Dysgu Personol.

Fel rhan o raglen Llywodraeth Cymru, mae Colegau Ceredigion a Choleg Sir Gâr yn cynnig sawl cwrs am ddim mewn sectorau sy’n debygol o fod â chyfleoedd gwaith, gan gynnwys adeiladu, cyllid, TG, iechyd a diogelwch, rheoli prosiectau a pheirianneg.

Mae’r rhaglen ar gyfer pobl sydd ar ffyrlo ar hyn o bryd, ar gontract dim oriau, neu sydd mewn perygl o golli eu swydd, cyn belled â’u bod yn 19 oed neu drosodd ac yn ennill llai na £26,000.

Yn dilyn peilot llwyddiannus gyda Choleg Gwent a Grŵp Llandrillo Menai a welodd tua 500 o bobl o bob cwr o Gymru’n ymrestru ar gyrsiau rhan-amser wedi’u hariannu’n llawn, mae Cyfrifon Dysgu Personol nawr ar gael ledled Cymru gyda’r nod o helpu miloedd o bobl i hybu eu sgiliau a’u gallu i gael gwaith.

Cynlluniwyd y cyrsiau hyn yn arbennig i gyfateb i’r bylchau sgiliau a nodwyd mewn sectorau blaenoriaeth yng Nghymru. Mae cyflogwyr a rhanddeiliaid wedi gweithio mewn partneriaeth â cholegau i ddatblygu cyrsiau sy’n berthnasol i sectorau y mae disgwyl iddynt greu cyfleoedd swyddi nawr ac yn y dyfodol agos.

Mae’r holl gyrsiau yn rhai rhan-amser a hyblyg ac wedi’u cynllunio ar gyfer astudio o amgylch swydd ac amgylchiadau’r unigolyn. Mae llawer yn cael eu darparu ar-lein sy’n golygu y gall staff astudio o bell, fin nos ac ar benwythnosau.

Mae rhai o’r cyrsiau sy’n cael eu cynnig yng Ngholeg Ceredigion a Choleg Sir Gâr gydol mis Ionawr a mis Chwefror ar gyfer pobl sy’n rhedeg eu busnes eu hunain, ac maent yn cynnwys Strategaeth Brand, Cyfryngau Cymdeithasol ar gyfer Busnes, Hyfforddi a Mentora, NEBOSH Rheoli’n Ddiogel ac IOSH Gweithio’n Ddiogel.

Dywedodd y Gweinidog Addysg, Kirsty Williams:

“Mae’r pandemig wedi effeithio ar lawer o ddiwydiannau’n anffodus, gyda llawer o bobl yn chwilio am ffyrdd o ennill sgiliau gwaith newydd, yn eu coleg lleol o bosibl.

“Mae Cyfrifon Dysgu Personol wedi’u cynllunio i helpu pobl sy’n gweithio ac sydd mewn perygl o golli eu swydd. Os ydych yn poeni am sicrwydd eich swydd, neu ar ffyrlo neu gontract dim oriau, gallai cael Cyfrif Dysgu Personol ddarparu’r sgiliau a’r cymwysterau rydych eu hangen i gychwyn ar yrfa newydd gyffrous.

“Wrth i ni weithio tuag at hawl i ddysgu gydol oes yng Nghymru, mae’r Cyfrifon Dysgu Personol yn dangos beth y gellir ei gyflawni i unigolion, yr economi a’r wlad gyfan.”

Un dysgwr sydd eisoes wedi cymryd rhan yn y cwrs Strategaeth Brand yw’r hyfforddwr personol hunangyflogedig James Cartwright. Caewyd y gampfa lle mae James yn gweithio dros y cyfyngiadau symud, a oedd yn golygu na allai James barhau â’i waith. Cwblhaodd James y cwrs Strategaeth Brand i helpu i roi hwb i’w fusnes ac, ers hynny, mae wedi cofrestru ar gyfer cwrs chwe wythnos mewn Cyfryngau Cymdeithasol ar gyfer Busnesau

Bach.

Meddai: “Fe wnes i fwynhau’r cwrs yn fawr, a galla i ddim aros am yr un nesaf. O’r sesiwn gyntaf, mae wedi ysgogi llawer o feddwl am yr hyn rwy’n ei wneud ac mae wedi rhoi cymaint o eglurder i mi yn barod ynglŷn â ble mae angen i mi gymryd pethau.”

Dywedodd Jemma Parsons, Cydgysylltydd Prosiect PLA, Tîm Datblygu Busnes ac Ymgysylltu â Chyflogwyr yng Ngholeg Ceredigion a Choleg Sir Gâr: “Rydyn ni’n falch iawn o fod yn gweithio gyda Llywodraeth Cymru a’r Bartneriaeth Sgiliau Rhanbarthol i gyflwyno’r Cyfrif Dysgu Personol. Rydyn ni’n edrych ymlaen at gefnogi unigolion yn eu hyfforddiant a’u datblygiad i symud ymlaen yn eu gyrfaoedd presennol a gyrfaoedd newydd a chyflawni eu dyheadau. Mae’r hyfforddiant hwn a ariennir wedi dod ar adeg anodd iawn i bawb.

“Rydyn ni’n gobeithio cefnogi unigolion drwy ddysgu wyneb yn wyneb lle bo modd, gan gadw at gyfyngiadau’r Llywodraeth i sicrhau bod ein holl ddysgwyr a staff yn cadw’n ddiogel, ond rydyn ni wedi datblygu’r Ddarpariaeth Blwyddyn Newydd i gynnwys dysgu ar-lein ac mewn Ystafell Ddosbarth Rithwir.

“Rydyn ni’n edrych ymlaen at gynnig cyfle i unigolion a chyflogwyr uwchsgilio mewn meysydd fel Digidol a Thechnoleg, y Cyfryngau, Iechyd a Gofal Cymdeithasol, Adeiladu a Diwydiannau Creadigol. Mae gennym ni rai cydweithrediadau cyffrous iawn ar y gweill a fydd yn hyrwyddo’r cyfleoedd i unigolion a chyflogwyr yn y rhanbarth.”

I gael rhagor o wybodaeth am gyrsiau yng Ngholeg Sir Gâr, ewch i:

www.colegsirgar.ac.uk/index.php/en/personal-learning-accounts

www.colegsirgar.ac.uk/index.php/cy/cyflogwyr-mobile/cyfrifon-dysgu-personol

I gael rhagor o wybodaeth am gyrsiau yng Ngholeg Ceredigion, ewch i:

www.ceredigion.ac.uk/index.php/en/personal-learning-accounts

www.ceredigion.ac.uk/index.php/cy/personal-learning-accounts/177-pla/493-cyfrifon-dysgu-personol

Popeth sydd angen i ti ei wybod am Gyfrifon Dysgu Personol

Beth ydyn nhw?

Mae sefydlu Cyfrif Dysgu Personol yn rhoi mynediad i ti i hyfforddiant am ddim a fydd yn helpu i wella dy ragolygon gwaith a dy yrfa’n gyffredinol. Galli ddewis o blith dros 1,000 o gyrsiau mewn 10 sector yn cynnwys adeiladu, cyllid, digidol, iechyd a gofal cymdeithasol a pheirianneg, ac astudio gartref ar-lein o amgylch dy ymrwymiadau eraill.

Pwy sy’n gymwys?

Unrhyw un dros 19 oed sy’n ennill llai na £26,000 neu unrhyw un sydd ar ffyrlo ar hyn o bryd, ar gontract dim oriau, neu sydd mewn perygl o golli eu swydd.

Sut mae gwneud cais?

Mae modd gwneud cais am Gyfrif Dysgu Personol drwy Cymru’n Gweithio a siarad â chynghorydd lleol. Ffonia 0800 028 4844 neu dos i https://cymrungweithio.llyw.cymru/cysylltwch-a-ni i gael rhagor o wybodaeth.

Faint mae’n gostio?

Mae am ddim! Mae’r holl gyrsiau coleg sy’n rhan o’r rhaglen Cyfrifon Dysgu Personol wedi’u hariannu gan Lywodraeth Cymru. Yr unig gost fydd yn rhaid i ti ei thalu yw dy dreuliau os bydd angen i ti deithio.

Pa gyrsiau alla i eu dilyn?

Mae yna gannoedd o gyrsiau ar gael gan holl golegau Cymru. Cymer olwg ar wefannau’r colegau eu hunain i gael rhagor o wybodaeth.

Dewisa o blith cymwysterau yn y meysydd canlynol:

Cyfrifeg

Busnes a rheoli

Adeiladu

TG a digidol

Peirianneg

Ffotograffiaeth

Gwasanaeth cwsmeriaid

Deunyddiau a gweithgynhyrchu uwch

Manwerthu, twristiaeth a hamdden

Lletygarwch ac arlwyo

Iechyd a gofal cymdeithasol

Bwyd a’r tir

Ynni a’r amgylchedd

Oes rhaid i mi fynd i fy ngholeg lleol neu alla i astudio unrhyw le yng Nghymru?

Mae llawer o golegau’n addysgu ar-lein yn unig a gall hynny olygu y galli di edrych y tu hwnt i dy goleg lleol. Fodd bynnag, efallai y bydd dysgu wyneb yn wyneb yn ofynnol yn ystod y cwrs felly bydd angen i ti ystyried amser a chostau teithio.

Am ragor o wybodaeth, dos i https://cymrungweithio.llyw.cymru/cyfrif-dysgu-personol neu ffonia Gyrfa Cymru ar 0800 028 4844.