Cafodd deg ysgol yn Sir Benfro eu cydnabod yn ddiweddar am eu hymrwymiad i ddysgu yn ac am yr amgylchedd naturiol mewn Diwrnod Dathlu arbennig ar gyfer Ysgolion Awyr Agored Sir Benfro.
Cafodd y digwyddiad ei gynnal ym Maenordy Scolton ger Hwlffordd ac roedd Jeremy Miles AS, Gweinidog y Gymraeg ac Addysg Llywodraeth Cymru, yno i gyflwyno tystysgrifau i staff ac i ddisgyblion o’r ysgolion llwyddiannus. Cafodd y disgyblion gyfle hefyd i fwynhau amrywiaeth o weithgareddau awyr agored o adeiladu cuddfannau ac adnabod bywyd gwyllt i weithdai mwd a helfeydd bwystfilod bach.
Roedd partneriaid PODS hefyd yn bresennol gan gynnwys cynrychiolwyr o Awdurdod Parc Cenedlaethol Arfordir Penfro, Canolfan Darwin, Cyngor Sir Penfro, Tir Coed, Fforwm Arfordir Sir Benfro, Cadwch Gymru’n Daclus a Bwrdd Iechyd Prifysgol Hywel Dda.
Dywedodd Jeremy Miles AS, Gweinidog y Gymraeg ac Addysg: “Roedd hi’n wych gweld enghreifftiau o ysgolion a phartneriaid yn Sir Benfro yn cydweithio i ddarparu profiadau awyr agored i blant.
“Mae chwarae a dysgu yn yr awyr agored yn meithrin parch gydol oes at fyd natur ac at yr amgylchedd ac mae’n fuddiol i iechyd meddwl a chorfforol plant, yn ogystal â’u helpu i ddatblygu sgiliau datrys problemau.”
Dywedodd Bryony Rees, Cydlynydd Ysgolion Awyr Agored Sir Benfro: “Roedd hi’n wych gallu cyflwyno Gweinidog y Gymraeg ac Addysg i rai o’r ysgolion lleol sydd wedi gwneud addysg awyr agored yn rhan allweddol o’u cwricwlwm ysgol.
“Roedd hi’n arbennig o addas cael y ddau bennaeth a oedd wedi sefydlu PODS, Simon Thomas a Kevin Phelps, yn bresennol i ddathlu’r garreg filltir hon wrth i’r bartneriaeth geisio datblygu a sicrhau cyllid i barhau â’i gwaith yn y dyfodol.”
Ychwanegodd Kevin Phelps, Pennaeth Ffederasiwn Ysgolion Cynradd Tafarn Ysbyty a Thredeml: “Roedd Simon a minnau wrth ein bodd ein bod wedi cael ein gwahodd i’r digwyddiad gwych hwn. Mae hi wedi bod yn anhygoel gweld syniad a gawson ni flynyddoedd yn ôl yn datblygu i fod yn brosiect mor bwysig, gan ddod â phrofiadau dysgu o ansawdd yn yr awyr agored i gynifer o’n dysgwyr.”
Y deg ysgol a oedd yn y diwrnod dathlu oedd Ysgol Gynradd Tafarn Ysbyty, Ysgol Gynradd Tredeml, Ysgol Cas-mael, Ysgol Gynradd Hook, Ysgol Gymunedol Pennar, Ysgol Gynradd Gatholig Teilo Sant, Ysgol Gynradd yr Eglwys yng Nghymru Penrhyn, Ysgol Gynradd Cosheston, Ysgol y Glannau ac Ysgol Aberllydan.
I gael rhagor o wybodaeth am PODS ewch i http://pembrokeshireoutdoorschools.co.uk/cy.
Diwedd
|
| Help keep news FREE for our readersSupporting your local community newspaper/online news outlet is crucial now more than ever. If you believe in independent journalism,then consider making a valuable contribution by making a one-time or monthly donation. We operate in rural areas where providing unbiased news can be challenging. |
