Gyrfa Cymru yn cyhoeddi rhestr fer ar gyfer Gwobrau Partneriaid Gwerthfawr

Mae Gyrfa Cymru wedi cyhoeddi’r cyflogwyr sydd ar restr fer eu Gwobrau Partneriaid Gwerthfawr 2023.

Mae cyfanswm o 40 o sefydliadau wedi cyrraedd y rhestr fer mewn wyth categori ar gyfer darparu cymorth gyrfaoedd rhagorol i ddisgyblion mewn ysgolion.

I gyd-fynd â dathliad deng mlynedd Gyrfa Cymru fel cwmni Cymru gyfan, mae’r gwobrau’n cael eu noddi gan Weinidog yr Economi, Vaughan Gething, a byddant yn cael eu cynnal ar 22 Tachwedd yn adeilad y Pierhead ar ystâd y Senedd yng Nghaerdydd.

Mae’r gwobrau yn gyfle i Gyrfa Cymru gydnabod cyflogwyr sydd wedi gweithio gyda nhw i ddarparu profiadau gyrfa sy’n cael effaith ac atyniadol i ddisgyblion yng Nghymru dros y 12 mis diwethaf.

I ddathlu deng mlynedd ers sefydlu’r cwmni Cymru gyfan, mae eleni’n cynnwys gwobr ychwanegol i gydnabod cyflawniad rhagorol cyflogwyr sydd wedi cefnogi ysgolion dros y degawd diwethaf.

Trwy weithio’n agos gydag ysgolion, mae’r sefydliadau hyn yn cefnogi pobl ifanc i wneud cysylltiadau rhwng yr hyn y maent yn ei ddysgu yn yr ysgol a’r byd gwaith ac i ddeall y cyfleoedd sydd ar gael iddynt.

Dywedodd Nikki Lawrence, prif weithredwr Gyrfa Cymru: “Rydym yn falch iawn o gael cynnal Gwobrau Partneriaid Gwerthfawr 2023 eleni gyda chefnogaeth Gweinidog yr Economi.

“Mae’r digwyddiad hwn yn ein galluogi i ddiolch i fusnesau am ddarparu profiadau ystyrlon i ddisgyblion a’u grymuso â gwybodaeth yn ymwneud â gwaith a fydd yn eu helpu i lunio eu dyfodol.

“Mae dod â chyflogwyr ac ysgolion ynghyd i ddarparu addysg gyrfaoedd gwerthfawr yn helpu i ysbrydoli ac ysgogi cenhedlaeth iau a gweithlu’r dyfodol yng Nghymru.

“Mae 2023 yn flwyddyn arbennig i’r gwobrau, wrth i ni ddathlu degawd fel cwmni Cymru gyfan a chydnabod un cyflogwr sydd wedi mynd gam ymhellach dros y ddegawd i helpu pobl ifanc i ddysgu mwy am fyd gwaith.

“Rwy’n edrych ymlaen at groesawu’r holl sefydliadau ar y rhestr fer i adeilad hanesyddol y Pierhead ar 22 Tachwedd a dymunaf pob lwc iddynt.”

Dywedodd Gweinidog yr Economi, Vaughan Gething: “Mae Llywodraeth Cymru wedi ymrwymo i fuddsoddi yng nghenedlaethau’r dyfodol a darparu’r offer sydd eu hangen ar bobl ifanc i adeiladu gyrfaoedd llwyddiannus yn y dyfodol.

“Diolch i’r cyflogwyr sydd ar y rhestr fer yn y Gwobrau Partneriaid Gwerthfawr eleni am roi’r cyfle i bobl ifanc ryngweithio â nhw, gan ganiatáu iddynt ehangu eu gorwelion a darganfod ble mae eu diddordebau. Bydd yn helpu i sicrhau y gallant fod ar flaen y gad wrth helpu ein busnesau Cymreig i arloesi a thyfu.

“Hoffwn hefyd ddiolch i’n gwasanaeth gyrfaoedd cenedlaethol rhagorol, Gyrfa Cymru, am eu gwaith caled dros y ddegawd ddiwethaf. Pob lwc i bawb a enwebwyd.”

Y rhestr lawn o gategorïau a’r rhai sydd wedi cyrraedd y rownd derfynol yw:

Gwobr 10 Mlynedd Cyflawniad Eithriadol

• Castell Howell
• Bwrdd Iechyd Prifysgol Hywel Dda
• Morgan Sindall Construction
• Principality
• The Celtic Collection

Newydd-ddyfodiad Gorau

• Bute Energy
• In The Welsh Wind Distillery
• JCB
• Robertson
• Wrexham Lager

Y Berthynas Barhaus Orau gydag Ysgol

• Dwr Cymru
• Microchip
• Morganstone
• Rhaglen Datblygu Gweithlu Gofal Cymdeithasol Cymru
• Welsh Slate

Busnesau Bach Mwyaf Cefnogol

• Kidslingo/Meithrinfa Wibli Wobli
• LGD Twist Salon
• Newport Pets
• Ripples Marketing
• The A2B Tyre Shop

Cyfraniad Personol Eithriadol

• Chris Hooper – Cyngor Bwrdeistrefol Sirol Torfaen
• Colette Affaya – Airbus
• Gwenno Williams – Cyngor Gwynedd
• Kathy Roberts – Brother Industries UK
• Rhys Bebb – Screen Alliance Wales

Cyflogwr Profiad Gwaith Mwyaf Cefnogol

• Brooklyn Motors
• Cefn Mably Farm Park
• Cottage Coppicing
• M Delacy & Sons Holding Ltd
• Jac-Y-Do Nursery

Hyrwyddwr Gorau’r Gymraeg yn y Gweithle

• Bwrdd Iechyd Prifysgol Betsi Cadwaladr
• Cyngor Bwrdeistref Sirol Caerffili
• Canolfan S4C Yr Egin
• Griffiths
• ISG

Cefnogwr Gorau’r Agenda Sero Net

• Adra
• Bluestone Wales
• EDF Renewables UK
• Viridor
• Wynne Construction