Bu prif gwmni llaeth cydweithredol Cymru, Hufenfa De Arfon yn dathlu Dydd Gŵyl Dewi trwy ymweld â phencadlys prif archfarchnadoedd y DU i rannu danteithion caws a menyn Dragon.
Fel rhan o raglen Bwyd a Diod Cymru Llywodraeth Cymru i ddathlu Dydd Gŵyl Dewi, aeth tîm Hufenfa De Arfon draw i brif swyddfeydd Tesco, Morrisons, Asda a Sainsbury’s, gan dynnu sylw at gynnyrch Cymreig a dathlu tapestri cyfoethog cynhyrchwyr Cymreig.
Nod rhaglen Bwyd a Diod Cymru yw meithrin sector bwyd a diod ffyniannus a deinamig yng Nghymru sy’n cael ei gydnabod yn fyd-eang am ei ragoriaeth.
Gan ddechrau eu gweithgareddau Dydd Gŵyl Dewi yng Nghymru gyda sioe fasnach Castell Howell yn y de, aethant ymlaen i Welwyn Garden City, Leeds, Bradford, Llundain gan gyfarfod â llunwyr penderfyniadau allweddol rhai o fanwerthwyr mwyaf y DU. Cafwyd taith wib cyn dychwelyd yn ôl i Gymru ar gyfer sioeau masnach Castell Howell a Harlech yn y gogledd.
Anfonwyd caws Dragon o gwmpas y byd hefyd, i Lysgenhadaeth Prydain yn Nhwrci ac India ar gyfer digwyddiadau Dydd Gŵyl Dewi.
Dywedodd Kirstie Jones, Rheolwr Marchnata Hufenfa De Arfon, “Ynghyd â chynhyrchwyr Cymreig hynod eraill, cychwynnom ar yr antur hon i rannu stori ein brand Dragon – symbol o dreftadaeth Gymreig, crefftwaith, ac ymroddiad heb ei ail ein ffermwyr.
“Roedd yn foment o falchder i ni gynrychioli hanfod Cymru, gan arddangos ein caws a menyn Cymreig hyfryd, a rhannu sut mae’r cynhyrchion hyn yn dyst i’r ansawdd a’r angerdd sy’n rhan o bob tamaid.
“Hoffem ddiolch i Tesco, Morrisons, Asda, Sainsbury’s a Llywodraeth Cymru am wneud y profiad hwn yn bosibl. Gobeithio y bydd llawer mwy o gyfleoedd i rannu cynnyrch gwych o Gymru gyda phawb.”
| [donate]
| Help keep news FREE for our readersSupporting your local community newspaper/online news outlet is crucial now more than ever. If you believe in independent journalism,then consider making a valuable contribution by making a one-time or monthly donation. We operate in rural areas where providing unbiased news can be challenging. |
