Bydd prosiect ARLOESOL sy’n defnyddio’r dechnoleg ddiweddaraf i helpu i lywio cynllunio canol trefi yn mynd ar daith yr haf hwn.

Bydd Trefi Smart Towns Cymru yn cynnal cyfres o ddigwyddiadau ledled Cymru gan ddechrau yng Nghasnewydd ar ddydd Iau 16 Mai.

Ar ôl croesawu hyd at 120 o bobl i’w gynhadledd gyntaf, a gynhaliwyd yn Nhŷ Pawb yn Wrecsam yn gynharach eleni, mae’r rhaglen – a gaiff ei chyflwyno gan Fenter Môn sydd wedi’i lleoli ar Ynys Môn ac ym Mhorthmadog – yn awyddus i ymgysylltu â hyd yn oed mwy o fusnesau ac awdurdodau lleol yng Nghymru.

Y nod yw dod â phobl allweddol sy’n gwneud penderfyniadau ar y stryd fawr at ei gilydd gyda manwerthwyr a phartïon perthnasol i helpu i roi bywyd i economïau lleol ledled y wlad.

Dywedodd Kiki Rees-Stavros, Rheolwr y Prosiect: “Rydyn ni’n annog busnesau i fynychu ac ymgysylltu â’u hawdurdodau lleol a’u cynghorau tref a chymuned i edrych ar ffyrdd o symud ymlaen gyda’i gilydd, i drafod pa faterion y maen nhw’n eu hwynebu a sut y gallant weithio mewn partneriaeth i’w datrys.

“Mae hwn yn llwyfan gwych i ddod â sefydliadau at ei gilydd o dan un to a rhannu arferion gorau mewn lleoliad anffurfiol, ac i ddysgu sut mae ardaloedd eraill wedi elwa o’r dechnoleg anhygoel a’r arferion arloesol sydd wedi cael effaith gadarnhaol ar drefi a phentrefi eraill.”

Ychwanegodd: “Rwy’n gobeithio y bydd pobl yn manteisio ar y cyfle hwn – yng Nghasnewydd a’r rhanbarthau eraill y byddwn yn ymweld â nhw yr haf hwn – yn enwedig yn dilyn llwyddiant ein cynhadledd gyntaf erioed yn Wrecsam, lle gwnaethom gofrestru 19 o Lysgenhadon Smart newydd a chael cynrychiolwyr o 19 o’r 22 awdurdod lleol yng Nghymru.

“Gyda’n gilydd, byddwn yn parhau i archwilio a datblygu atebion cynaliadwy a fydd o fudd i fusnesau, yn helpu i gynyddu nifer yr ymwelwyr ac yn taflu goleuni ar dueddiadau yng nghanol ein trefi, a fydd yn eu tro yn dylanwadu ar benderfyniadau yn y dyfodol.”

Mae dros 50 o bobl eisoes wedi cofrestru ar gyfer y digwyddiad yng Nghasnewydd, a bydd cyflwyniadau ar y diwrnod gan Owen Davies Consulting o’r Fenni, VZTA o Gaerffili, arweinwyr mewn ecosystemau Trefi Smart, BABLE Smart Cities, ac arloeswyr datblygu meddalwedd Kodergarten, o Wynedd, a dreialodd dechnoleg seismoleg arloesol fel rhan o’r prosiect Patrwm Lleoedd Clyfar ehangach yn yr Eisteddfod Genedlaethol yr haf diwethaf.

Yna, bydd y sioe deithiol yn symud ymlaen i’r ardaloedd canlynol: Aberhonddu (Mehefin 4), Y Drenewydd (Mehefin 5), Ynys Môn (Gorffennaf 5), a Sir y Fflint (Gorffennaf 10).

Cafodd y prosiect Trefi Smart Towns Cymru ei lansio yn 2021 yn cael ei ariannu gan Lywodraeth Cymru ac mae wedi hyrwyddo defnyddio technoleg a data i adfywio’r stryd fawr ar hyd a lled Cymru a hybu gwneud penderfyniadau ar sail data.

Ewch i www.mentermon.com i gael rhagor o newyddion a gwybodaeth gan Menter Môn.

I archebu lle ar un o’r digwyddiadau sydd ar y ffordd, ewch i Eventbrite: Digwyddiadau Trefi SMART Towns Cymru – 7 Digwyddiad ar y Ffordd a Thocynnau | Eventbrite

I gael rhagor o wybodaeth am gynhadledd Smart Towns Cymru, gwyliwch y fideo yma: Cynhadledd Trefi SMART Towns Cymru Conference (youtube.com)