Mae Pencampwriaeth Rygbi Dan 20 y Byd yn cael ei darlledu ar S4C – gyda holl gemau Cymru ar gael i’w gwylio’n fyw.
Mae’r sianel deledu wedi sicrhau’r hawliau i ddarlledu’r bencampwriaeth yn 2015 a 2016 drwy gyfrwng y Gymraeg.
Ac fe fydd S4C yn darlledu’r gêm rhwng Cymru a Japan yn fyw ar nos Fercher, 10 Mehefin (cic gyntaf, 5.15pm) yn ystod yr wythnos hon.
Pencampwriaeth Rygbi Dan 20 y Byd yw’r gystadleuaeth sy’n dangos y safon uchaf o gystadlu mewn cystadlaethau rhyngwladol o dan 20 oed.
Mae’r digwyddiad yn cael ei gynnal yn Yr Eidal eleni, gyda’r ffeinal ar Fehefin 20, gêm y bydd S4C yn ei darlledu’n fyw.
Bydd gemau eraill Cymru yn y bencampwriaeth hefyd yn cael eu darlledu’n fyw, ond mae pwy fydd y gwrthwynebwyr hynny’n dibynnu ar y canlyniadau blaenorol.
Bydd Gareth Roberts yn cyflwyno’r rhaglenni o’r digwyddiad rhyngwladol dan 20, a bydd Cennydd Davies a Gareth Rhys Owen yn sylwebu ar y gemau, yn ogystal â phersonoliaethau eraill profiadol o’r byd rygbi fydd yn rhannu eu harbenigedd a’u dadansoddiad o’r gêm.
Mae Pencampwriaeth Rygbi Dan 20 y Byd yn rhan enfawr o flwyddyn o rygbi ar S4C. Yn ystod mis Medi yma fe fydd y sianel hefyd yn gyfrifol am ddarlledu ymgyrch carfán Cymru yng Nghwpan Rygbi’r Byd 2015. Ond mae Pencampwriaeth Rygbi Dan 20 y Byd yn gyfle i wylio sêr y dyfodol.
Meddai Sue Butler, Golygydd Chwaraeon S4C, “Mae rygbi dan 20 wedi newid gêr dros y blynyddoedd diwethaf ac wedi symud o fod yn gyfle ar gyfer datblygu chwaraewyr, i fod yn ddigwyddiad o bwys. Mae gan gynulleidfa rygbi S4C ddisgwyliadau uchel – ac erbyn hyn mae’r gemau dan 20 yn cael eu hystyried fel gornestau atyniadol a deniadol. Rydym ni’n hynod falch i allu darlledu Pencampwriaeth Rygbi Dan 20 y Byd yn fyw ar S4C.”
Dywed Cadeirydd Undeb Rygbi Cymru, Gareth Davies, “Rydyn ni wrth ein boddau bod S4C yn darlledu holl gemau Cymru ym Mhencampwriaeth Rygbi Dan 20 y Byd yn ystod y mis nesaf. Mae ymrwymiad o’r math yma gan ein partner darlledu yn dangos pa mor bwysig yw rygbi dan 20 yng Nghymru i S4C. Dyma elfen allweddol o strategaeth Undeb Rygbi Cymru fydd yn datblygu chwaraewyr o’r safon uchaf i chwarae i’r timau rhanbarthol a chenedlaethol.”
Dywed Murray Barnett, Pennaeth Masnachol, Darlledu a Marchnata World Rugby, “Rydym ni wrth ein bodd i weithio mewn partneriaeth gyda S4C – darlledwr sydd yn hynod angerddol am rygbi ac am y bencampwriaeth hon. “Mae’r bencampwriaeth yn addo bod yn ddigwyddiad cyffrous iawn yn yr Eidal eleni, lle bydd sêr y dyfodol yn gallu arddangos eu talent yn ystod blwyddyn enfawr ar gyfer rygbi.”
Pencampwriaeth Rygbi Dan 20 y Byd: Cymru v Japan
Dydd Mercher 10 Mehefin, 5.15 ar S4C
Ar alw: s4c.cymru/clic
Gwefan: s4c.cymru
Cynhyrchiad Sunset + Vine Cymru ac SMS ar gyfer S4C
| [donate]
| Help keep news FREE for our readersSupporting your local community newspaper/online news outlet is crucial now more than ever. If you believe in independent journalism,then consider making a valuable contribution by making a one-time or monthly donation. We operate in rural areas where providing unbiased news can be challenging. |
