Heddiw, cyhoeddodd Cronfa Gymunedol y Loteri Genedlaethol, yr ariannwr mwyaf o weithgarwch cymunedol yng Nghymru, y byddai dau aelod newydd yn ymuno â Phwyllgor Cymru.
Mae’r rhai a benodir yn cynnwys Trystan Pritchard, Prif Swyddog Gweithredol Hosbis Dewi Sant a Gwenllian Lansdown Davies, Prif Swyddog Gweithredol Mudiad Meithrin.
Byddant yn goruchwylio’r broses o wneud grantiau yng Nghymru ar adeg pan fo’r Gronfa’n parhau i gefnogi pobl a chymunedau yr effeithir arnynt fwyaf gan COVID-19 – gan adeiladu ar a chryfhau’r cysylltiadau, y sefydliadau a’r gwydnwch sy’n galluogi cymunedau i ffynnu.
Trystan Pritchard, o Wynedd, yw Prif Swyddog Gweithredol Hosbis Dewi Sant ac mae wedi meithrin perthynas â sefydliadau ar draws y Trydydd Sector yng Nghymru. Mae hefyd yn Aelod o Fwrdd Gofal Cymdeithasol Cymru ac mae eisoes wedi cadeirio Pwyllgor Cymru ar gyfer Cyngor ar Bopeth Cymru.
Wrth ymuno â Chronfa Gymunedol y Loteri Genedlaethol, dywedodd Trystan: “Mae Cronfa Gymunedol y Loteri Genedlaethol yn bwysicach nag erioed o ran helpu cymunedau yng Nghymru i ddatblygu mentrau newydd, ymateb i heriau newydd a helpu i fynd i’r afael ag anghydraddoldebau. Rwy’n edrych ymlaen at gyfrannu at y gwaith hwn a gobeithio y gallaf helpu i sicrhau bod y prosiectau a’r manteision rhagorol a ddarperir gan y gronfa yn parhau yn ystod y cyfnod ansicr hwn.”
Yn olaf, Gwenllian Lansdown Davies, o Bowys, yw Prif Swyddog Gweithredol Mudiad Meithrin. Mae hi wedi cael gyrfa mewn sawl maes polisi o wleidyddiaeth gynrychioliadol, i ymchwil o’r blynyddoedd cynnar i addysg uwch, ac mae ganddi ddealltwriaeth gref o ddiwylliant, economi a gwleidyddiaeth amrywiol Cymru.
Wrth groesawu’r newyddion am ei phenodiad, dywedodd Gwenllian: “Mae help Cronfa Gymunedol y Loteri yn gwneud gwahaniaeth i nifer fawr o brosiectau a phobl ledled Cymru. ‘Dwi’n edrych ymlaen at gael cyfle i fod yn rhan o’r gwaith gan wybod nad oes pall ar syniadau gwych am sut i greu cymunedau gwydn sy’n llefydd da i fyw a bod”.
Dywedodd Dr Simone Lowthe-Thomas, Cadeirydd Pwyllgor Cymru: “Rwy’n falch o groesawu Trystan a Gwenllian i Bwyllgor Cymru Cronfa Gymunedol y Loteri Genedlaethol. Maent yn dod â chyfoeth o brofiad o’r trydydd sector a’r sector gwirfoddol yng Nghymru, yn enwedig ym maes iechyd, addysg a chydraddoldeb, amrywiaeth a chynhwysiant. Bydd eu harbenigedd yn ein gadael mewn sefyllfa well fyth i gael arian y Loteri Genedlaethol i gymunedau ledled Cymru.”
Y llynedd dosbarthwyd £31 miliwn mewn 850 o grantiau ledled y wlad, diolch i arian a godwyd gan chwaraewyr y Loteri Genedlaethol.
| [donate]
| Help keep news FREE for our readersSupporting your local community newspaper/online news outlet is crucial now more than ever. If you believe in independent journalism,then consider making a valuable contribution by making a one-time or monthly donation. We operate in rural areas where providing unbiased news can be challenging. |
