Mae gweithwyr priffyrdd Cyngor Sir Caerfyrddin yn dechrau ar eu gwaith blynyddol o dorri’r glaswellt wrth ymyl y ffordd yr wythnos hon, i wneud y briffordd yn ddiogel a gofalu am gynefinoedd pwysig ar yr un pryd.
Fel rhan o’i ddyletswydd i ddiogelu bioamrywiaeth, dim ond mewn swatiau un metr fydd y glaswellt yn cael ei dorri yn y rhan fwyaf o fannau, a hynny lle mae tyfiant yn effeithio ar allu defnyddwyr ffyrdd i weld yn glir ac yn achosi perygl i gerddwyr. Bydd sawl ymyl ffordd yn cael eu gadael tan yn ddiweddarach yn y flwyddyn er mwyn caniatáu i flodau hadu cyn cael eu torri.
Bydd llawer o’r llecynnau glaswelltog a’r blodau gwyllt sydd wrth ymyl y ffordd yn Sir Gâr yn cael eu gadael heb eu torri i gynnal bywyd gwyllt lleol a phryfed peillio.
Dim ond os oes pryderon iechyd a diogelwch y bydd torri’n digwydd yn y mannau hyn, yn enwedig mewn parthau 30-40mya mewn trefi a phentrefi.
Y tirfeddiannwr cyfagos sydd â chyfrifoldeb dros wrychoedd a choed ffin a dylid eu harchwilio a’u cynnal yn rheolaidd. Os nad yw coed a pherthi yn cael eu rheoli’n gywir gallant amharu ar ddiogelwch ffyrdd, yn enwedig ger cyffyrdd neu droeon lle gallant beryglu gwelededd hanfodol.
Dywedodd yr Aelod Cabinet dros Wasanaethau Trafnidiaeth, Gwastraff a Seilwaith, y Cynghorydd Edward Thomas: “Mae’r gwaith hwn wedi’i ddatblygu’n ofalus i wneud yn siŵr fod y briffordd yn ddiogel a bod ardaloedd pwysig o gynefin yn ddiogel. Mae cyfrifoldeb arnom ni i gadw’r ffyrdd yn ddiogel i bob defnyddiwr, sicrhau gwelededd, darparu mannau i gerddwyr gamu oddi ar y ffordd os nad oes llwybrau troed, ac atal rhywogaethau dieisiau rhag lledaenu. Fodd bynnag, rydym ni’n torri cyn lleied ag sydd raid. Yn y rhan fwyaf o leoedd, caiff y borfa ei thorri mewn swatiau un metr yn unig lle mae tyfiant yn effeithio ar allu defnyddwyr ffyrdd i weld yn glir ac yn achosi perygl i gerddwyr. Mae llawer o’r ymylon yn cael eu torri yn gynharach neu’n hwyrach yn y tymor er mwyn caniatáu i rywogaethau brodorol ffynnu.”
Mae pryfed peillio yn hanfodol ar gyfer cynnal a chadw ecosystemau trwy beillio planhigion gwyllt sy’n sail i’r mwyafrif o gynefinoedd. Maent hefyd yn chwarae rhan bwysig wrth gynhyrchu llawer o gnydau.
Mae’r cyngor yn gwarchod a gwella bioamrywiaeth ac mae ganddo ystod o brosiectau ar waith i gefnogi rhywogaethau a chynefinoedd lleol.
Gall rheoli ardaloedd ar gyfer bywyd gwyllt ddarparu cyfleoedd i unigolion, grwpiau cymunedol ac ysgolion er mwyn iddynt gymryd rhan, sydd o fudd i fywyd gwyllt ac i bobl.
Ewch i’n tudalennau Bioamrywiaeth i gael rhagor o wybodaeth a syniadau am ffyrdd o gefnogi cadwraeth leol.
I gael rhagor o wybodaeth am waith y Cyngor o ran torri glaswellt wrth ymyl y ffordd, ewch i’n hadran Cwestiynau Cyffredin ar wefan y cyngor sirgar.llyw.cymru
| [donate]
| Help keep news FREE for our readersSupporting your local community newspaper/online news outlet is crucial now more than ever. If you believe in independent journalism,then consider making a valuable contribution by making a one-time or monthly donation. We operate in rural areas where providing unbiased news can be challenging. |
