Mae Sialens Ddarllen boblogaidd yr Haf yn ôl yn llyfrgelloedd a hybiau Caerdydd eleni fel rhan o Haf o Hwyl sy’n ceisio ysbrydoli plant yn y ddinas i ddysgu mwy am wyddoniaeth ac arloesedd.
Mae’r her yn rhan o haf llawn hwyl o weithgareddau a digwyddiadau yn llyfrgelloedd a hybiau Caerdydd. Eleni bydd bonws ychwanegol gyda mwy o weithgareddau a digwyddiadau’n cael eu cynnal fel rhan o Brosiect Teclynwyr y rhaglen Haf o Hwyl a gefnogir gan Lywodraeth Cymru.
Mae’r Teclynwyr hefyd yn thema Sialens Ddarllen yr Haf ac unwaith eto gall plant gofrestru a darllen chwe llyfr o’u dewis eu hunain, a chael llawer o hwyl, dros fisoedd yr haf.
Bydd chwe chymeriad ffuglennol – teclynwyr – sy’n dod yn fyw gyda help yr awdur a’r darlunydd plant Julian Beresford – yn defnyddio eu chwilfrydedd a’u synnwyr rhyfeddod i ddeall y wyddoniaeth y tu ôl i amrywiaeth eang o ddiddordebau, o ffasiwn a thechnoleg i goginio a cherddoriaeth.
Bydd hybiau a llyfrgelloedd ar draws y ddinas yn lansio Sialens Ddarllen yr Haf eleni, a gyflwynir gan The Reading Agency ac sy’n cael ei darparu gan lyfrgelloedd a hybiau cyhoeddus ledled y wlad bob blwyddyn, ddydd Sadwrn, 9 Gorffennaf, gyda llawer o weithgareddau hwyl. Yn Rhiwbeina, tra bod y llyfrgell yn cael ei hailddatblygu, cynhelir y parti lansio ddydd Gwener, 8 Gorffennaf yng Nghanolfan Beulah. Ewch i www.hybiaucaerdydd.co.uk i weld be sy’ mlaen
Dywedodd yr Aelod Cabinet dros Dai a Chymunedau, y Cynghorydd Lynda Thorne: “Mae Sialens Ddarllen yr Haf yn ffordd hwyl o gymell plant i barhau i ddarllen dros wyliau’r ysgol i gynnal eu sgiliau llythrennedd. Dros y ddwy flynedd ddiwethaf, prin fu’r cyfleoedd i ddathlu’r sialens fel yr hoffem, felly rwy’n falch iawn y bydd ein hybiau a’n llyfrgelloedd eleni yn gallu cynnal rhaglen lawn o ddigwyddiadau a gweithgareddau i ddod â phlant a theuluoedd yn ôl i’n cyfleusterau rhagorol.
“Cymerodd dros 3,000 o blant ran yn y sialens y llynedd ond hoffem roi hwb sylweddol i’r niferoedd hynny, felly rwy’n annog pob plentyn 4 i 11 oed yn y ddinas i gofrestru, darllen a chael Haf o Hwyl gwych gyda ni.”
Ar ôl cofrestru, bydd plant yn gallu casglu sticeri, nodau tudalen a chardiau casglwyr wrth iddynt weithio eu ffordd drwy eu chwe llyfr. Bydd pawb sy’n cwblhau’r sialens hefyd yn cael tystysgrif a medal.
Mae’n hawdd cofrestru, galwch heibio i’ch llyfrgell neu’ch hyb lleol neu cofrestrwch ar-lein yma: https://sialensddarllenyrhaf.org.uk/
Yn dilyn llwyddiant y Gaeaf Llawn Lles, unwaith eto, bydd gwasanaeth llyfrgelloedd Caerdydd yn gweithio gyda The Reading Agency i ddarparu Prosiect Teclynwyr – rhaglen o ddigwyddiadau a gweithgareddau ar gyfer llyfrgelloedd ledled Cymru, gan ganolbwyntio ar les a datblygiad plant fel rhan o Haf o Hwyl 2022 a gefnogir gan Lywodraeth Cymru.
| [donate]
| Help keep news FREE for our readersSupporting your local community newspaper/online news outlet is crucial now more than ever. If you believe in independent journalism,then consider making a valuable contribution by making a one-time or monthly donation. We operate in rural areas where providing unbiased news can be challenging. |
