Plaid Cymru Sir Gaerfyrddin yn trafod polisi gydag undeb amaeth

Ymgeiswyr Plaid Cymru Sir Gaerfyrddin yn trafod polisi gydag undeb amaeth

Bu trafodaeth am rhwng Huw James, Cadeirydd Sir Gaerfyrddin o Undeb Amaethwyr Cymru, Ian Rickman, Llywydd Undeb Amaethwyr Cymru ac ymgeiswyr Plaid Cymru yn Sir Gaerfyrddin i’r Senedd am faterion allweddol sy’n effeithio ar amaeth yn ystod ymweliad â fferm Tyddyn ger Llanwinio heddiw (dydd Gwener, 27 Mawrth).

Defnyddiodd Cefin Campbell, Nerys Evans, Adam Price a Mari Arthur – sy’n sefyll i fod yn Aelodau Plaid Cymru o’r Senedd dros Sir Gaerfyrddin yn yr etholiad ar 7 Mai – y cyfle i amlinellu rhaglen bolisi eu plaid ar gyfer llywodraeth.

Ymhlith rhain mae sicrhau cyllid aml-flwyddyn ar gyfer ffermydd, mynd i’r afael â TB, comisiynu adolygiad ar fiwrocratiaeth yn y sector a diwygio rheoliadau NVZ.

Dywedodd Nerys Evans, sy’n ail ar restr Plaid Cymru yn Sir Gaerfyrddin:

“Roedd hi’n dda cael y cyfle heddiw i glywed am y pynciau llosg, pryderon a gobeithion y ffermwyr sy’n cael eu cynrychioli gan Undeb Amaethwyr Cymru. Rydym yn gwybod fod Llafur wedi gadael cefn gwlad Cymru i lawr am yn rhy hir ac mae angen newid.

“Rwy’n hyderus fod y rhaglen bolisi amaeth sydd wedi’i amlinellu gan Blaid Cymru yn gynnig ymarferol, effeithiol i fynd i’r afael â’r heriau sy’n wynebu’r ffermydd teuluol a’r cymunedau sy’n ddibynnol arnynt a sicrhau fod dyfodol llewyrchus i’r cenedlaethau sy’n dod.”

Yn dilyn yr ymweliad, dywedodd Cadeirydd Undeb Amaethwyr Cymru Sir Gaerfyrddin, Huw James:

“Roedd yn bleser croesawu Cefin, Nerys, Adam a Mari i Dyddyn, a chael y cyfle i drafod y realiti sy’n wynebu ffermydd teuluol yma yn Sir Gaerfyrddin.

“Mae ffermwyr yn delio ag ansicrwydd sylweddol – o newidiadau parhaus i gynlluniau cymorth i effaith ddinistriol TB mewn gwartheg – ac mae’n hanfodol bod polisïau’r dyfodol yn darparu sefydlogrwydd, tegwch a gweledigaeth hirdymor glir i’n diwydiant.

“Nid yn unig mae ffermio yn ganolog i gynhyrchu bwyd: mae’n sail i les economaidd, cymdeithasol a diwylliannol ein cymunedau gwledig. Mae cefnogi’r sector yn golygu cefnogi’r cymunedau sy’n dibynnu arno, a sicrhau y gallent barhau i ffynnu i’r dyfodol.”

---

[donate]	Help keep news FREE for our readers Supporting your local community newspaper/online news outlet is crucial now more than ever. If you believe in independent journalism,then consider making a valuable contribution by making a one-time or monthly donation. We operate in rural areas where providing unbiased news can be challenging. Read More About Supporting The West Wales Chronicle