Bydd Rosie Boddy, cyn-Brentis Awyrennau Airbus – sydd erbyn hyn yn Swyddog Hyfforddiant Technegol yng Ngholeg Cambria Glannau Dyfrdwy – yn cystadlu yn y categori Cynnal a Chadw Awyrennau yn WorldSkills 2024, sy’n cael ei chynnal fis Medi yn Lyon, Ffrainc.
Mae Rosie, sy’n 22, o Farnborough yn wreiddiol. Mae hi’n byw ym Mrychdyn erbyn hyn ac yn un o ddim ond 31 o gystadleuwyr o’r Deyrnas Unedig. Mae Rosie yn edrych ymlaen at yr her o gystadlu yn erbyn pobl ifanc 25 oed ac iau o dros 65 o wledydd.
Roedd Rosie wrth ei bodd i gael swydd barhaol yn y coleg ar ôl cwblhau Diploma Estynedig NVQ Lefel 3 mewn Peirianneg Awyrennau.
Roedd Rosie yn diolch i dîm Gyrfaoedd Cynnar Airbus ac i staff a chyn-ddarlithwyr y coleg am eu cefnogaeth, yn arbennig y Cyfarwyddwr Cwricwlwm – Prentisiaethau Llawn Amser, Jamie Mapp-Jones.
“Roeddwn i mor falch o gael fy newis ar gyfer Tîm y Deyrnas Unedig, mae’n brofiad heb ei ail,” meddai.
“Dechreuodd fy nhaith WorldSkills UK yn ôl yn 2021 gydag Airbus. Roeddwn i’n cystadlu yn Rowndiau Terfynol Cenedlaethol y Deyrnas Unedig, a’r un peth yn y flwyddyn ganlynol, gan ennill medal aur yn y categori Cynnal a Chadw Awyrennau.
“Cefais fy newis i fod yn rhan o Garfan y Deyrnas Unedig a chefais 14 mis o hyfforddiant yn rhan o hyn. Mae cael bod yn rhan o Dîm y Deyrnas Unedig rŵan a chael cynrychioli fy ngwlad yn anhygoel.
“Mae’r broses wedi bod yn un heriol ac roedd llawer o’r hyfforddiant yn digwydd o amgylch gwaith ac ar ddiwrnodau pan nad oeddwn i’n gweithio. Mae’n siŵr o fynd yn anoddach yn y cyfnod sy’n arwain at fis Medi ond rydw i wedi cyffroi’n llwyr am y daith ac mor ddiolchgar am y profiad.”
Ychwanegodd Rosie: “Mae Coleg Cambria ac Airbus wedi bod yn hynod gefnogol drwy gydol fy mhrentisiaeth ac rŵan mod i’n aelod o staff, fedra’i ddim diolch digon iddyn nhw am hynny.
“Mae’r gefnogaeth gan bawb yn WorldSkills UK hefyd wedi bod yn anhygoel trwy gydol y broses. Maen nhw wir yn eich gwthio i fod y gorau y gallwch chi ei fod, o safbwynt sgiliau ac o’r ochr perfformiad a llesiant sydd mor bwysig ar gyfer cystadleuaeth.
“Byddwn i wir yn annog pobl ifanc i gymryd rhan, mae’n ffordd wych o feithrin eich sgiliau a rhoi hwb i’ch gyrfa. Mae’r hyfforddiant a gefais yn ystod y broses wedi bod yn wych ac rydw i wedi dysgu cymaint yn barod sydd wedi fy helpu yn fy swydd yng Ngholeg Cambria.
“Rydw i wedi cynhyrfu’n lân am Lyon, mae’n mynd i fod yn gyfle anhygoel i ddangos fy sgiliau ac rydw i’n falch iawn o fod yn rhan ohono.”
Roedd Jamie yn canmol Rosie am ei hymroddiad i’r broses WorldSkills a dywedodd: “Dangosodd Rosie yn glir ei sylw i fanylion yn ystod ei blwyddyn gyntaf fel prentis a gwnaeth ymdrech i wella ei sgiliau a’i gwybodaeth fel Peiriannydd Awyrennau.
“Mae’r gwytnwch y mae Rosie wedi’i ddangos wrth berfformio yng nghystadleuaeth genedlaethol y Deyrnas Unedig yn HMS Sultan, ac wrth dreulio blwyddyn arall yn hyfforddi i ennill aur yng Nghaerdydd flwyddyn yn ddiweddarach, yn dangos ei bod hi’n amlwg ei bod ar y trywydd iawn ar gyfer y cyfle gwych hwn i gynrychioli’r Deyrnas Unedig yn y gystadleuaeth fawreddog hon.”
Bydd Tîm y Deyrnas Unedig yn cystadlu mewn meysydd yn cynnwys seiberddiogelwch, ynni adnewyddadwy, adeiladu digidol, coginio, trin gwallt, a phaentio ac addurno.
Dywedodd Ben Blackledge, Prif Weithredwr WorldSkills UK: “WorldSkills Lyon 2024 – meddyliwch am y Gemau Olympaidd – a’r wobr yw’r sgiliau o safon fyd-eang y mae cyflogwyr y Deyrnas Unedig yn crefu amdanynt.
“Allwn i ddim bod yn fwy balch o’r bobl ifanc eithriadol sydd yn Nhîm y Deyrnas Unedig; maen nhw’n fodelau rôl gwych.”
Dywedodd Luke Hall, y Gweinidog ar gyfer Sgiliau, Prentisiaethau ac Addysg Uwch: “Pob lwc i’n cystadleuwyr hynod dalentog. Mae WorldSkills yn gyfle gwych i brofi ar y llwyfan byd-eang ein bod wedi adeiladu system sgiliau a phrentisiaethau o safon fyd-eang. Rwy’n gobeithio gweld ein prentisiaid a’n myfyrwyr ar y podiwm yn Lyon.”
I gael rhagor o wybodaeth am WorldSkills eleni, ewch i’r wefan: WorldSkills UK | Raising Apprenticeships & Technical Education Standards.
Ewch i www.cambria.ac.uk i gael y newyddion a’r wybodaeth ddiweddaraf gan Goleg Cambria.
DIWEDD
| [donate]
| Help keep news FREE for our readersSupporting your local community newspaper/online news outlet is crucial now more than ever. If you believe in independent journalism,then consider making a valuable contribution by making a one-time or monthly donation. We operate in rural areas where providing unbiased news can be challenging. |