Cyhoeddi dathliadau Canmlwyddiant yr Urdd – deufis i fynd

Parti Pen-blwydd mwyaf yn hanes y mudiad ac ymgeisio am ddau deitl GUINNESS WORLD RECORDS™

Mae mudiad ieuenctid cenedlaethol mwyaf Cymru, Urdd Gobaith Cymru yn dathlu ei ganmlwyddiant yn 2022, a heddiw (25 Tachwedd) mae’n cyhoeddi rhai o’r cynlluniau ar gyfer blwyddyn gyffrous o ddathlu i nodi’r garreg filltir hon yn ei hanes. Ers 1922, mae’r Urdd wedi darparu cyfleoedd i fwy na 4 miliwn o blant a phobl ifanc Cymru fwynhau profiadau chwaraeon, celfyddydol, preswyl, dyngarol a gwirfoddol drwy gyfrwng y Gymraeg.

Union ddeufis i heddiw, ar 25 Ionawr 2022, bydd dathliadau’r flwyddyn yn dechrau gyda Pharti Pen-blwydd mwyaf yn hanes y mudiad ar ddiwrnod Cariad @ Urdd. Bydd yr Urdd a’r genedl gyfan yn ymgeisio amddau deitl Guinness World Records™ drwy gyd-ganu ac uwchlwytho fideos o’r gân eiconig, Hei Mistar Urdd, i Twitter a Facebook. Cynhelir parti arbennig ar gyfer ysgolion Cymru yng nghwmni cyflwynwyr Stwnsh Sadwrn, a ddarlledir yn fyw ar BBC Radio Cymru a BBC Radio Wales.

Dywedodd Siân Lewis, Prif Weithredwr yr Urdd: “Does dim dwywaith fod y cyfnod ers mis Mawrth 2020 wedi bod y cyfnod mwyaf heriol yn ein hanes. O ganlyniad i bandemig Covid-19, bu’n rhaid cau ein gwersylloedd a daeth ein gweithgareddau cymunedol, chwaraeon a chelfyddydol arferol i stop. 

“Ond, rydym yn ail-adeiladu, ac mi fydd blwyddyn ein canmlwyddiant yn flwyddyn i’w chofio, gyda chynlluniau pob adran yn adlewyrchiad o’n hysbryd a’n huchelgais. Rydym hefyd yn buddsoddi yn sylweddol yn ein gwersylloedd a bydd tri agoriad cyffrous yn 2022; agoriad y Gwersyll amgylcheddol cyntaf o’i fath yng Nghymru ym Mhentre Ifan, Sir Benfro; agoriad Calon y Gwersyll yn Llangrannog ac agoriad Canolfan Ddŵr newydd yng Nglan-llyn.”

Bydd rhai o uchafbwyntiau eraill y flwyddyn yn cynnwys teithiau rhyngwladol i bobl ifanc i America, Iwerddon a Norwy; sy’n cynnwys cynlluniau arbennig ar gyfer Neges Heddwch ac Ewyllys Da’r canmlwyddiant. A bydd yr Adran Chwaraeon yn arwain ar ŵyl Gemau Trefol Cymru ym Mae Caerdydd – a fydd yn arddangos chwaraeon Olympaidd newydd megis BMX a sglefr fyrddio; Cynhadledd Chwaraeon Ieuenctid Benywaidd cyntaf Cymru, sef #FelMerch; yn ogystal â chynnal Thwrnamaint Urdd WRU Rygbi 7 bob ochor. Hefyd cynhelir Cyngerdd Dathlu Canmlwyddiant yr Urdd gyda Cherddorfa Genedlaethol Gymreig y BBC; mae S4C wedi comisynu cyfres gyffrous sy’n mynd â ni’n nôl i Langrannog drwy’r degawdau a gaiff ei ffilmio dros y Gwanwyn gan Boom Cymru; a bydd y cynhyrchiad theatr Sioe Mewn Cymeriad ‘Canrif Syr Ifan’ yn teithio o amgylch ysgolion Cymru.

Parhaodd Siân Lewis wrth sôn am y dathliadau: “Galwaf ar holl ysgolion Cymru, aelwydydd, gwirfoddolwyr, busnesau a mudiadau, ac aelodau hen a newydd i ymuno ym mharti mwyaf ein hanes! Mae hwn yn gyfle i chi ddathlu ac yn gyfle i ni ddiolch i bawb sydd wedi chwarae rhan fach neu fawr i wneud yr Urdd yn fudiad allweddol bwysig i Gymru a’r Cymry. Cofrestrwch i fod yn rhan o’r parti a’r ymgais amddau deitl Guinness World Records™ ddeufis i heddiw, ac i weld enw eich ysgol, aelwyd neu sefydliad ar fap o Gymru ar ein gwefan, a rhannwch eich bod wedi ymuno gan ddefnyddio #Urdd100.”

I gyd-fynd gyda datganiad cynlluniau’r canmlwyddiant ac Wythnos Archwiliwch Eich Archif, mae cartref swyddogol archif yr Urdd, Llyfrgell Genedlaethol Cymru, wedi croesawu Mistar Urdd i ymweld â’i archif ei hun ac yn awyddus i atgoffa pawb o bwysigrwydd archifau fel cofnod hanesyddol o bwys. Gellir dysgu am bob agwedd o waith yr Urdd dros y ganrif ddiwethaf yn archif y llyfrgell yn Aberystwyth lle mae cofnod o’r cyfan ar gael.

Yn ogystal â dathlu’r wythnos archif gyda Mistar Urdd yr wythnos hon, bydd y Llyfrgell Genedlaethol yn cynnal nifer o ddigwyddiadau i nodi blwyddyn arbennig yr Urdd, gan gynnwys arddangosfeydd a gweithdai.

Dywedodd Pedr ap Llwyd, Prif Weithredwr a Llyfrgellydd y Llyfrgell Genedlaethol: “Mae’r  Urdd yn parhau i fod yn fudiad cenedlaethol anhepgorol sy’n dal i gyfoethogi bywydau plant a phobl ifanc a hyrwyddo’r Gymraeg yr un pryd, a hynny canmlynedd ers iddo gael ei sefydlu.   Ni ellid mesur maint cyfraniad y mudiad i’n bywyd cenedlaethol a braf yw medru dweud fod llawer o waith y mudiad wedi’i gofnodi yma yng nghasgliadau’r Llyfrgell, mewn archif, llyfrau, sain a delweddau symudol. Mae’r cyfan yn brawf o weithgaredd mudiad y dylem ni i gyd fod mor falch ohono. Braint o’r mwyaf ydy cael bod yn rhan o ddathliadau canmlwyddiant yr Urdd a chael cwrdd â Mistar Urdd ei hun, un o’m harwyr i!”

I fynychu Parti Pen-blwydd yr Urdd ac i ymuno yn yr ymgais amddau deitl Guinness World Records™ mae angen cofrestru ar wefan yr Urdd: www.urdd.cymru/100. Wrth i ysgolion a mudiadau gofrestru byddant yn ymddangos ar fap ar wefan y canmlwyddiant, ble mae fideos ac adnoddau parti ar gael i bawb. Yn ogystal â mynychu’r parti mae’r Urdd yn gwahodd partneriaid, busnesau, ysgolion a mudiadau ledled Cymru i nodi’r canmlwyddiant drwy chwifio baner yr Urdd ar 25 Ionawr. Mae Senedd Cymru, Amgueddfa Werin Sain Ffagan, Big Pit ac Amgueddfa Genedlaethol y Glannau ynghyd â nifer o adeiladu eiconig eraill Cymru wedi ymrwymo eisoes i chwifio baner yr Urdd, a gellir archebu baner drwy wefan yr Urdd.

Bydd rhagor o weithgareddau’r canmlwydiant yn cael ei cyhoeddi dros y misoedd nesaf ar wefan y canmlwyddiant www.urdd.cymru/100.