Plaid yn beirniadu rhagrith Llafur ar bolisi cap dau blentyn

Mae Plaid Cymru wedi cyhuddo Llafur o “rhagrith syfrdanol” ar y cap budd-dal dau blentyn.

Heddiw, mae prif weinidog Cymru wedi galw ar y Prif Weinidog Syr Keir Starmer i ddileu’r cap budd-dal dau blentyn. Mae hyn yn dilyn adroddiadau bod Llywodraeth y DU bellach yn ystyried dileu’r polisi cyn eu hadolygiad gwariant.

Dywedodd llefarydd cyfiawnder cymdeithasol a blynyddoedd cynnar Plaid Cymru, Sioned Williams, fod yr alwad yn dangos “rhagrith syfrdanol” gan fod y polisi yn un y mae Llafur wedi gwrthod ei wrthwynebu dro ar ôl tro yng Nghaerdydd a San Steffan gan rwystro ymdrechion i ddod â’r polisi i ben ychydig fisoedd yn ôl.

Dywedodd Eluned Morgan hefyd fod ei llywodraeth yn “bryderus iawn am dlodi plant”. Mae tlodi plant wedi bod yn gyfrifoldeb Llywodraeth Lafur Cymru am y 26 mlynedd diwethaf.

Mae ystadegau Llywodraeth Cymru a gyhoeddwyd y mis diwethaf yn dangos bod tlodi plant wedi codi 2% i 31% yng Nghymru, y cynnydd uchaf o holl genhedloedd y DU.

Dywedodd llefarydd Plaid Cymru dros gyfiawnder cymdeithasol a blynyddoedd cynnar, Sioned Williams AS,

“Mae hyn yn rhagrith syfrdanol gan Lafur.

“Y Nadolig diwethaf, gwnaeth Eluned Morgan wawdio Plaid Cymru am fynnu cael gwared ar y cap dau blentyn. Mor ddiweddar â mis Hydref diwethaf, pleidleisiodd ASau Llafur yn erbyn ein galwadau yn y Senedd i sefyll dros blant mewn tlodi a dod â’r cap creulon hwn i ben.

“Yn y cyfamser yn San Steffan, ni chefnogodd unrhyw AS Llafur Cymru ein hymdrechion i’w ddileu – ac ataliodd Keir Starmer ei ASau ei hun am bleidleisio i amddiffyn plant.

“Nawr, yn sydyn, mae Llafur yn newid eu tôn. Byddai rhywun yn cael ei faddau am feddwl nad yw hyn yn ymwneud ag egwyddor, ond panig – wedi’i yrru gan arolygon barn, nid gwerthoedd.

“Mae Plaid Cymru wedi bod yn gyson o’r dechrau. Rydym wedi ymladd i gael gwared ar y cap dau blentyn oherwydd mai dyma’r peth iawn i’w wneud i filoedd o blant sy’n tyfu i fyny mewn tlodi. Yng Nghymru, fe wnaethom arwain y ffordd ar brydau ysgol am ddim cyffredinol. Ac yn y llywodraeth, rydym yn addo cyflwyno Taliad Plant Cymru – taliad wythnosol uniongyrchol i gynnig cymorth go iawn, wedi’i dargedu i gefnogi teuluoedd sydd ei angen fwyaf.

---

	Help keep news FREE for our readers Supporting your local community newspaper/online news outlet is crucial now more than ever. If you believe in independent journalism,then consider making a valuable contribution by making a one-time or monthly donation. We operate in rural areas where providing unbiased news can be challenging. Read More About Supporting The West Wales Chronicle