Mae pobl ifanc sydd â diddordeb yn y diwydiant bwyd a diod yn cael cynnig cyfle unigryw i fynd y tu ôl i’r llenni yn un o ddigwyddiadau mwyaf Cymru, sef Sioe Frenhinol Cymru.
Mae rhaglen Sgiliau Bwyd a Diod Cymru Llywodraeth Cymru yn gwahodd Mynegiannau o Ddiddordeb gan unigolion 18 oed a throsodd i gymryd rhan mewn profiad unigryw, trochol o fewn Lolfa Fusnes ac Arddangosfa Cynnyrch fawreddog Adran Fwyd Llywodraeth Cymru ar lawr cyntaf y Neuadd Fwyd.
Lolfa Fusnes Bwyd a Diod Cymru, yw lle mae prynwyr bwyd a diod yn cwrdd â chyflenwyr ac yn archwilio cynhyrchion newydd. Gyda dros 2,000 o gynhyrchion gan fwy na 300 o fusnesau Cymru i’w gweld, mae’r mynediad prin hwn yn cynnig cipolwg gwerthfawr ar sut mae’r diwydiant yn gweithredu ar lefel fasnachol.
Bydd ymgeiswyr llwyddiannus yn elwa o brofiad tywys dan arweiniad arbenigwyr yn y diwydiant, gan gynnwys y cyfle i gwrdd â thimau prynu, deall sut mae cynhyrchion yn cyrraedd silffoedd archfarchnadoedd, a chael gwybodaeth uniongyrchol am brosesau gwerthu a negodi. Bydd cyfranogwyr hefyd yn teithio o amgylch y Neuadd Fwyd brysur, yn cwrdd â chynhyrchwyr arloesol, ac yn profi amgylchedd cyflym masnachu o’r tu ôl i stondin.
Dywedodd Gweinidog Llyr Gruffydd, Gweinidog Cabinet dros Wydnwch Gwledig a Chynaliadwyedd:
“Mae Sioe Frenhinol Cymru yn gonglfaen i’n sector bwyd a diod, gan arddangos y gorau o gynnyrch a thalent Cymru. Mae’r cyfle cyffrous hwn yn rhoi cipolwg prin y tu ôl i’r llenni, i bobl ifanc ar sut mae ein diwydiant yn gweithredu ac yn ffynnu ar lefel fasnachol.
“Rydym wedi ymrwymo i gefnogi’r genhedlaeth nesaf i yrfaoedd gwerth chweil, ac mae profiadau fel hyn yn helpu i feithrin sgiliau, hyder a chysylltiadau gwerthfawr. Byddwn yn annog yn gryf unrhyw un sydd â diddordeb mewn bwyd a diod i wneud cais a manteisio ar y mewnwelediad unigryw hwn i sector fywiog sy’n tyfu, ac sydd mor bwysig i’n heconomi.”
Mae’r cyfle hwn yn ddelfrydol i’r rhai sydd â diddordeb mewn gyrfaoedd o fewn gwerthu, marchnata, manwerthu, entrepreneuriaeth, a’r sector bwyd a diod ehangach, gan ddarparu ffordd ymarferol a diddorol o ddatblygu gwybodaeth, hyder, a rhwydweithiau proffesiynol.
Bydd y profiad yn digwydd ar un diwrnod yn ystod wythnos Sioe Frenhinol Cymru ym mis Gorffennaf a bydd yn para tua thair awr. Bydd cyfranogwyr yn derbyn tocyn mynediad i’r Sioe am ddim, gyda chyfraniad tuag at gostau teithio hefyd ar gael.
Dywedodd Ifan Davies, cyn-gyfranogwr y cyfle hwn:
“Roedd cael y cyfle i fynd y tu ôl i’r llenni yn Sioe Frenhinol Cymru yn gyfle mor wych. Rhoddodd cael mynediad i Lolfa Fusnes ac Arddangosfa Cynnyrch Adran Bwyd Llywodraeth Cymru i weld sut mae prynwyr a chynhyrchwyr yn gweithio gyda’i gilydd, bersbectif newydd i mi ar sut mae cynnyrch yn cyrraedd y silffoedd. Teimlais fel petawn i wedi ennill cyfle euraidd pan gefais fy nhywys o amgylch y Lolfa Fusnes a’r Arddangosfa Cynnyrch.
Yn ogystal â chael sgwrs gyda chriw o weithwyr proffesiynol busnes gwych o Gymru, cefais feithrin hyder, cysylltiadau gwerthfawr, a gwell dealltwriaeth o’r gwahanol gyfleoedd gyrfa yn niwydiant bwyd a diod Cymru.”
Mae lleoedd yn gyfyngedig er mwyn sicrhau profiad trochol o ansawdd uchel, a disgwylir i ddiddordeb fod yn uchel. Nid yw cyflwyno Mynegiant o Ddiddordeb yn gwarantu lle, ond bydd pob ymgeisydd yn cael ei gydnabod.
Anogir y rhai sydd â diddordeb i wneud cais erbyn dydd Llun 29 Mehefin drwy lenwi’r ffurflen Mynegiant o Ddiddordeb ar-lein neu gysylltu ag emily.rees@mentera.cymru am ragor o wybodaeth.
| [donate]
| Help keep news FREE for our readersSupporting your local community newspaper/online news outlet is crucial now more than ever. If you believe in independent journalism,then consider making a valuable contribution by making a one-time or monthly donation. We operate in rural areas where providing unbiased news can be challenging. |
