Diolch i roddion, mae Elusennau Iechyd Hywel Dda, elusen swyddogol Bwrdd Iechyd Prifysgol Hywel Dda, wedi gallu ariannu detholiad o deganau meddal ar gyfer teuluoedd cleifion ar Ward Meurig yn Ysbyty Bronglais sy’n wynebu newyddion drwg a phrofedigaeth.
Mae elusen y GIG wedi prynu teganau meddal gwerth dros £200 gan Ymddiriedolaeth Osborne, fel eu tedi Ozzy yr Eliffant. Rhoddir y teganau hyn i blant a phobl ifanc y mae eu hanwyliaid ar y ward yn ddifrifol wael neu wedi marw yn anffodus, gan gynnig cysur a sicrwydd hanfodol yn ystod rhai o’r adegau anoddaf yn eu bywydau.
Dywedodd Ellen Masters, Gweinyddwr y Ward: “Rydym yn hynod ddiolchgar am y rhoddion sydd wedi ein galluogi i brynu’r teganau meddal ar gyfer Ward Meurig.
“Rhoddir y tedis yn benodol i gynnig cefnogaeth a chysur i blant cleifion ar Ward Meurig pan fydd rhywun agos atynt yn ddifrifol wael neu pan fyddant yn galaru, gan eu helpu i deimlo’n ddiogel a chael eu cefnogi pan fydd eu byd yn teimlo’n ansicr.
“I blant sy’n ymdopi â cholled, gall tegan meddal weithredu fel presenoldeb cyson, cyfarwydd ar adeg pan fo emosiynau’n llethol, gan roi rhywbeth iddynt ddal gafael ynddo am gynhesrwydd, sefydlogrwydd a mynegiant emosiynol.”
Dywedodd Nicola Llewelyn, Pennaeth Elusennau Iechyd Hywel Dda, elusen swyddogol Bwrdd Iechyd Prifysgol Hywel Dda: “Mae cefnogaeth ein cymunedau lleol yn ein galluogi i ddarparu gwasanaethau y tu hwnt i’r hyn y gall y GIG ei ddarparu yn nhai sir Hywel Dda ac rydym yn hynod ddiolchgar am bob rhodd a dderbyniwn.”
Am ragor o fanylion am yr elusen a sut y gallwch chi helpu i gefnogi cleifion a staff lleol y GIG, ewch i hywelddahealthcharities.nhs.wales.
| [donate]
| Help keep news FREE for our readersSupporting your local community newspaper/online news outlet is crucial now more than ever. If you believe in independent journalism,then consider making a valuable contribution by making a one-time or monthly donation. We operate in rural areas where providing unbiased news can be challenging. |
