Heddiw, mae Llywodraeth Cymru wedi cyhoeddi £4.4m y flwyddyn yn ychwanegol i gefnogi sectorau’r celfyddydau, diwylliant a chyhoeddi yng Nghymru.
Mae’r cyllid newydd, sydd wedi’i gynnwys yng Nghyllideb Derfynol 2025-26 – ar ben y cynnydd a gyhoeddwyd yn y Gyllideb Ddrafft – yn cynrychioli cynnydd o 8.5% i’r sector ar gyllideb refeniw y llynedd.
Mae hefyd yn ychwanegol at £73.8m a ddyrannwyd ar gyfer prosiectau cyfalaf a fydd yn helpu i ddiogelu a gwarchod asedau diwylliannol Cymru ar gyfer cenedlaethau’r dyfodol, gan wella profiadau a mynediad ymwelwyr. Mae hyn yn gynnydd o £18.4m ar lefelau 2024-25.
Meddai Jack Sargeant, Y Gweinidog Diwylliant, Sgiliau a Phartneriaeth Gymdeithasol:
“Mae’r buddsoddiad ychwanegol sylweddol hwn yn dangos ein hymrwymiad i sectorau diwylliannol a chelfyddydol Cymru.
“Nid ydym o dan unrhyw amheuaeth ynghylch yr heriau sy’n wynebu llawer o’n hamgueddfeydd, theatrau a mannau diwylliannol ac mae’r gyllideb hon yn gam sylweddol ymlaen o’r sefyllfa yr oeddem ynddi y llynedd, ac yn gyfle go iawn i symud tuag at sylfaen fwy diogel a chynaliadwy, a pharhau â hynny yn y dyfodol.
“Diolch i awydd gwirioneddol o bob rhan o Gabinet Llywodraeth Cymru i wneud popeth o fewn ein gallu, rwy’n falch iawn fy mod wedi gallu cymryd y cam arwyddocaol hwn i ddarparu cefnogaeth i’n cyrff celfyddydol, cyhoeddi a diwylliannol, sy’n cael eu gwerthfawrogi gymaint.
“Mae ein gwariant cyfalaf i helpu i ddiogelu ac amddiffyn asedau diwylliannol a threftadaeth Cymru yn y dyfodol bellach dros dair gwaith yr hyn ydoedd ddegawd yn ôl. Mae hyn yn cynnwys cefnogi prosiectau fel ailddatblygu Castell Caerffili, a gwaith ailwampio helaeth yn Theatr Clwyd ac Amgueddfa Wrecsam.
“Bydd y pecyn ariannu cynhwysfawr hwn yn helpu i ddiogelu a gwarchod diwylliant, celfyddydau, byd cyhoeddi a chwaraeon llawr gwlad Cymru, gan gefnogi eu rôl hanfodol mewn addysg, ymgysylltu cymunedol a thwristiaeth.”
Mae’r ymrwymiad diweddaraf hwn yn adeiladu ar y £1 miliwn o gyllid ychwanegol yn ystod y flwyddyn a ddarparwyd i’r sector ar ddiwedd 2024-25, a gefnogodd 60 o sefydliadau diwylliannol ledled Cymru trwy Gyngor Celfyddydau Cymru, yn ogystal â’r £5m o gyllid ychwanegol a gyhoeddwyd ym mis Medi.
| [donate]
| Help keep news FREE for our readersSupporting your local community newspaper/online news outlet is crucial now more than ever. If you believe in independent journalism,then consider making a valuable contribution by making a one-time or monthly donation. We operate in rural areas where providing unbiased news can be challenging. |
