Waw! Da iawn i 24 o staff a ffrindiau o Ofal Plant Gogerddan a ddringodd Cadair Idris ar gyfer Apêl Cemo Bronglais ar ôl i un o’u cydweithwyr gael diagnosis o ganser y fron.
Mae’r Rheolwr Gyfarwyddwr Emma Healy a’i staff wedi codi mwy na £2,000 i ddweud diolch am y gofal y mae eu cydweithiwr Jacqueline Walters yn ei dderbyn yn Uned Ddydd Cemotherapi Ysbyty Bronglais. Ac nid yw’n rhy hwyr i gyfrannu https://www.justgiving.com/GogerddanChildcare22
Dywedodd Emma, y mae ei meithrinfa ym Mhenrhyn-coch: “Tîm Gogerddan wnaeth e!
Diwrnod gwych yn dringo Cadair Idris i godi arian at Apêl Cemo Bronglais, wedi ein ffarwelio gan Jacqueline hyfryd a roddodd y cymhelliant i ni ac a’n hatgoffodd pam yr oeddem yn ei wneud.
“Mor falch o bawb; roedd yn ddringfa anodd ond wrth gefnogi a helpu ein gilydd fe wnaethom ni! Aeth un grŵp chwe milltir i’r llyn ac un yr 11 milltir lawn i’r brig!
“Diolch yn fawr iawn i bawb sydd wedi cyfrannu hyd yn hyn ac wedi anfon negeseuon, rydym yn ei werthfawrogi’n fawr. Diolch i Tesco am gyfrannu byrbrydau a diodydd, ac i Jade yn Wild Mountain Instruction a Kieran am fod y tywyswyr mwyaf hyfryd, cymwynasgar ac amyneddgar.”
Ychwanegodd Emma: “Roedden ni eisiau cefnogi’r Apêl oherwydd bod un o’n haelodau staff, Jacqueline Walters, yn derbyn triniaeth yn yr uned ddydd cemotherapi ar hyn o bryd ac mae hi’n gweld yn uniongyrchol sut mae angen uned newydd a’r effaith y bydd yn ei chael.”
Cafodd Jacqueline, 51, sy’n nyrs feithrin yn y ganolfan gofal plant ac yn byw ym Mronant, ddiagnosis o ganser y fron ym mis Ebrill ac ar ôl llawdriniaeth mae bellach yn derbyn cemotherapi yn yr uned.
Meddai: “Mae fy ngŵr Darryl a minnau mor falch o’r holl staff a hoffem ddiolch iddynt o waelod ein calonnau am eu cefnogaeth. Fe wnes i noddi un o fy nhedi bêrs, Idris, i fynd ar yr heic gyda nhw ac roedd yn wych gweld llun ohono ar y copa.”
Dywedodd Nicola Llewelyn, Pennaeth Elusennau Iechyd Hywel Dda, elusen swyddogol Bwrdd Iechyd Prifysgol Hywel Dda: “Rydym wrth ein bodd yn adrodd bod yr Apêl bellach wedi pasio ei tharged. Fodd bynnag, o ystyried yr hinsawdd economaidd bresennol, rydym yn rhagweld y bydd costau adeiladu yn cynyddu. Bydd pob ceiniog a godir, gan gynnwys rhoddion yn y dyfodol, felly yn mynd yn uniongyrchol i gronfa’r Apêl, gydag unrhyw arian dros ben yn cael ei ddefnyddio i gefnogi’r rhai yr effeithir arnynt gan ganser ar draws Ceredigion a chanolbarth Cymru.
“Rydym yn ddiolchgar i Emma, Jacqueline a staff y feithrinfa am eu cefnogaeth ac i bawb arall sydd wedi cyfrannu i’n helpu i gyrraedd ein targed.”
I gael rhagor o wybodaeth am yr Apêl ewch i: www.elusennauiechydhyweldda.org.uk
| [donate]
| Help keep news FREE for our readersSupporting your local community newspaper/online news outlet is crucial now more than ever. If you believe in independent journalism,then consider making a valuable contribution by making a one-time or monthly donation. We operate in rural areas where providing unbiased news can be challenging. |
