Cynhaliodd Jolene Saunders barti diwedd triniaeth ‘canu’r gloch’ a chodi £2,440 ar gyfer yr Uned Gofal y Fron yn Ysbyty Tywysog Philip.
Mae Jolene yn ffermwr 37 oed o Alltwalis sy’n byw gyda’i gŵr, Aled, a’u dau fab, Elis a Gwion.
Cynhaliodd Jolene y parti yng Nghlwb Rygbi Castell-nedd ym mis Ebrill i godi’r arian fel diolch am y gofal a gafodd yn yr uned.
Dywedodd Jolene: “Ym mis Mehefin 2024, cefais ddiagnosis o Garsinoma Dwythel Ymledol Cyfnod 2. Cefais lawdriniaeth ym mis Gorffennaf, ac yna 13 sesiwn o gemotherapi ac yna deg sesiwn o radiotherapi. Byddaf nawr mewn menopos cemegol i geisio atal y cyflwr rhag dychwelyd.
“O ddod o hyd i’r lwmp, i fiopsi, llawdriniaeth, triniaethau ac ôl-ofal, ni allaf feio ein gwasanaethau. Rydym mor ffodus iawn i gael mynediad nid yn unig at ofal canser, ond at rai o’r bobl fwyaf arbennig y byddwch chi byth yn cwrdd â nhw.
“Mae Dr Huws wedi bod mor gefnogol a charedig. Does dim byd yn ormod o drafferth iddi, mae hi’n mynd allan o’i ffordd i bawb. Gwnaeth i’n teulu deimlo mor ddiogel ac roedd ganddi’r holl amser yn y byd i fynd dros ein holl gwestiynau a phryderon.
“Roedd y parti’n anhygoel. Roedd gennym ni ddau ganwr wahanol, roedd llawer o yfed a dawnsio. Rwy’n siŵr bod llawer o bennau tost y diwrnod canlynol.
“Roedden ni wrth ein bodd gyda’r swm a godwyd. Mae’n rhywbeth i ddangos ein gwerthfawrogiad i’r uned. Hefyd, ym mis Medi fe godon ni £4,710 ar gyfer Ymddiriedolaeth y Dywysoges Fach. Fe wnes i barti ‘Brave the Shave’ cyn i mi golli fy ngwallt i’r cemotherapi, cyfranwyd fy ngwallt hefyd. Mae codi dros £7,500 mewn chwe mis yn anhygoel.
“Rwyf mor ddiolchgar am yr holl gefnogaeth a rhoddion. Hoffem ddiolch i Dr Huws, Kirsty a Helen yn yr Uned Gofal y Fron a’r holl angylion anhygoel sy’n gweithio yn Uned Cemotherapi Caerfyrddin. Maen nhw’n anhygoel a chefnogol. Mae mynd trwy gyfnod mor ofnadwy ond cael gofal gan y bobl orau y byddwch chi byth yn cwrdd â nhw mor galonogol.”
Dywedodd Dr Huws, Arbenigwr Cyswllt – Gofal y Fron: “Ar ran y tîm, hoffem ddiolch i Jolene, ei theulu a’i ffrindiau am y rhodd hael iawn. Rydym yn hynod ddiolchgar i chi gyd.”
Dywedodd Claire Rumble, Swyddog Codi Arian: “Mae cefnogaeth ein cymunedau lleol yn ein galluogi i ddarparu gwasanaethau y tu hwnt i’r hyn y gall y GIG ei ddarparu yn nhai sir Hywel Dda ac rydym yn ddiolchgar iawn am bob rhodd a dderbyniwn. Diolch yn fawr i Jolene a’i chefnogwyr!”
Mae eich rhoddion yn gwneud gwahaniaeth cadarnhaol i iechyd, lles a phrofiad cleifion y GIG, defnyddwyr gwasanaeth a staff.
Am fwy o fanylion am yr elusen a sut y gallwch chi helpu i gefnogi cleifion a staff lleol y GIG, ewch i: www.hywelddahealthcharities.org.uk
| [donate]
| Help keep news FREE for our readersSupporting your local community newspaper/online news outlet is crucial now more than ever. If you believe in independent journalism,then consider making a valuable contribution by making a one-time or monthly donation. We operate in rural areas where providing unbiased news can be challenging. |
