Mae prosiect newydd ar y gweill i ddarparu gwell hyfforddiant yn y gwaith i staff ar Ward 10 yn Ysbyty Llwynhelyg, a wnaed yn bosibl diolch i roddion elusennol fel rhan o’r cynllun ailwampio Ward 10 diweddar.
Elwodd ailwampio Ward 10, gwerth miliynau o bunnoedd, ar fwy na £ 500,000 o roddion elusennol o Gronfa Gwasanaethau Canser Sir Benfro ac Apêl Baner Ward 10 Elly, ynghyd â rhoddion sylweddol gan y diweddar Luke Harding a’i deulu.
Am y tro cyntaf ym Mwrdd Iechyd Prifysgol Hywel Dda, mae staff ar y ward wedi’i ailwampio yn derbyn hyfforddiant yn y gwaith i’w helpu i ddiwallu anghenion cleifion oncoleg, haematoleg a gofal lliniarol.
Mae Karen Phillips, Nyrs Glinigol Oncoleg Arbenigol ym Mwrdd Iechyd Prifysgol Hywel Dda gyda 30 mlynedd o brofiad nyrsio oncoleg, wedi’i secondio i swydd ran-amser Addysgwr Nyrsio Clinigol i gyflawni’r Rhaglen Addysg Oncoleg GRYMUSO fel rhan o brosiect peilot 12 mis.
Mae’r hyfforddiant ar y ward , a dechreuodd ym mis Gorffennaf 2021, yn canolbwyntio ar ystod eang o bynciau fel triniaethau, sgîl-effeithiau, argyfyngau, effaith seicolegol canser, rheoli sgyrsiau anodd a deiet ac ymarfer corff i gleifion.
Dywedodd Karen fod y prosiect wedi’i seilio ar rymuso’r tîm o 40 o bobl ar Ward 10, sy’n cynnwys nyrsys, myfyrwyr a gweithwyr gofal iechyd.
Ychwanegodd: “Mae cyflwyno’r hyfforddiant ar y ward yn golygu ei fod yn hyblyg, yn gynhwysol a gallwn weithio o amgylch cyfyngiadau staffio.
“Cafwyd adborth da iawn gan y nyrsys ar ôl ychydig sesiynau hyfforddi cyntaf, sy’n rhyngweithiol. Dyma ddysgu yn y gweithle mewn senarios bywyd go iawn.
“Nid yw bob amser yn ymarferol rhyddhau nyrsys i ffwrdd o’r ward i gael hyfforddiant. Mae’r prosiect yn mynd i’r afael â’u hanghenion addysgol yn y ffordd fwyaf hyblyg bosibl, gan gofio anghenion clinigol y ward.
“Mae’r nyrsys yn gyffrous i fod yn rhan o’r hyfforddiant hwn. Mae ailwampio ward 10 wedi bod yn gyfle perffaith i edrych ar anghenion y grŵp cleifion hwn ac i sicrhau bod gan y tîm nyrsio’r offer, ddydd a nos, i ddiwallu’r anghenion hynny. “
Dywedodd Lindsey Clark, Uwch Prif Nyrs ar Ward 10: “Mae’r rhaglen addysg yn fuddiol i bob aelod o staff gan gynnwys cynorthwywyr gofal iechyd, myfyrwyr nyrsio, nyrsys cofrestredig a hefyd y tîm meddygol ar Ward 10.
“Mae Karen wedi gweithio’n hynod o galed i ddarparu’r sesiynau addysgu yn ystod amser heriol iawn gyda’r gofynion beunyddiol sy’n ein hwynebu. Mae staff sydd wedi ymgymryd â rhai o’r modiwlau wedi magu hyder; maent yn teimlo bod y rhaglen yn helpu i ddatblygu eu gwybodaeth ac yn eu galluogi i ddarparu profiad gwell i’n cleifion. “
Dywedodd Andrew Burns, Cyfarwyddwr Ysbyty Llwynhelyg a Llawfeddyg Ymgynghorol: “Rydym yn falch o fod yn gweld yr arloesed hwn yn Ysbyty Llwynhelyg i wella’r profiad i’n cleifion. Diolch yn fawr i’n cefnogwyr am alluogi’r prosiect i ddigwydd. “
I gael mwy o fanylion am yr elusen a sut y gallwch chi helpu i gefnogi cleifion a staff lleol y GIG, ewch i www.elusennauiechydhyweldda.org.uk
| [donate]
| Help keep news FREE for our readersSupporting your local community newspaper/online news outlet is crucial now more than ever. If you believe in independent journalism,then consider making a valuable contribution by making a one-time or monthly donation. We operate in rural areas where providing unbiased news can be challenging. |
